A CIDADE DA CULTURA
Situada en Santiago de Compostela e concibida como un polo cultural de grande envergadura, dedicado ao coñecemento e a creatividade contemporánea, a Cidade da Cultura de Galicia perfilouse desde as súas orixes como un instrumento que, conxugando pasado e futuro, permitise a Galicia abordar de maneira integral un ámbito estratéxico para o seu desenvolvemento: o da cultura.
Despois de dez anos dun intenso e rico debate e dun coidado proceso construtivo, a Cidade da Cultura de Galicia bota a andar. Coa apertura da Biblioteca e do Arquivo de Galicia, inauguradas polos Príncipes de Asturias na simbólica data do 11 de xaneiro de 2011 (11/1/11), ábrese unha nova etapa na que este proxecto cobra vida.