Telescopios,  prismáticos e planisferios volverán tomar as noites do Gaiás para observar planetas coma Xúpiter e Mercurio, coñecer fenómenos tan curiosos como o das estrelas dobres ou deixarse abraiar polas Bágoas de San Lourenzo ao tempo que se descobre a cara quizais menos coñecida e máis misteriosa da Cidade da Cultura.

A través de telescopios e prismáticos,  e seguindo as explicacións técnicas dos monitores do Observatorio Astronómico Ramón María Aller, os participantes observarán a lúa, planetas, nebulosas… Ademais, coa axuda dun planisferio, aprenderán a identificar as constelacións a simple vista.

Este ano volverán organizarse sesións especiais como “A noite das Perseidas”, para gozar a noite do 12 ao 13 das chamadas “bágoas de san Lourenzo”, ao tempo que se celebrarán tres obradoiros didácticos ao redor dos reloxos de sol, os telescopios e os meteoritos.