Chega o outono ao Gaiás e con el a súa festa por excelencia: os magostos. Serán magostos temperáns, os primeiriños do ano, mais escritos cada un deles cunha “M” ben grande da nosa cultura: a de Milladoiro, Marful e Mofa e Befa.

O Espazo -1 do Museo Centro Gaiás ábrese ás faíscas xeniais destes xigantes, convidando a todos a tisnarse de melodías tradicionais, de ritmos novos, de retranca e teatro.

Serán magostos con sorpresas, nos que celebrar aniversarios como os 35 anos de Milladoiro, nos que Marful compartirá escea con músicos convidados e nos que Mofa e Befa botarán man de “vellos amigos” para recuperar algúns dos seus sketches clásicos.

E estade seguros que estas tres noites non faltarán castañas. Antes de cada espectáculo, os amigos da Cantina do Gaiás, coa axuda da Indicación Xeográfica Protexida Castaña de Galicia, ofrecerán creativas e divertidas tapas confeccionadas a base deste produto.